廠仔紐卡素 煞科喪攻鬥入波

今晚英超最受注目煞科戰，紐卡素主場對阿仙奴唔似係悶波，1.52倍入球大最抵玩！首循環紐卡素以3:7慘敗，收咧戰當然希望攞個尾彩，加上兵工廠嘅禾確特今季「病貓變老虎」，入球同助攻數字同樣創新高，專門拆「紐」入波靠晒佢！

阿仙奴基奧特回歸
首循環紐卡素3度扳平，最後都要慘敗，佢哋嘅領隊、球員同擁躉，肯定唔會忘記呢次恥辱。既然英超降班形勢已經大定，紐卡素冇埋護級包袱唔會玩死守，唔好忘記，最近12場主場比賽佢哋有10次開入球大，聖占士公園球場可以話係入球騷保證，今季佢哋已經衰到要護級，唔通休季前最後一場波會悶球迷咩？球迷唔會收貨囉！

對手阿仙奴贏波就至少有第4名踢歐聯外圍賽，領隊雲格最近已諗定組軍計劃，信心大過天。不過咁，由於中場阿迪達停賽，兵工廠中場防守力會更加弱，好容易失波，與其要1.49倍客W，不如博入球大好過，特別係佢哋有射手基奧特坐完3場波監復出，普多斯基上場又梅開二度咁弗，呢場形勢上要贏波至穩陣，萬一失波肯定會喪攻。

喜鵲第3門將受靶
事實上，兵工廠近9場有7勝2和，信心全面回升，而且「小老虎」禾確特連續3場入波，今季連盃賽上陣42場，攻入21球助攻14次，絕對係頂級球星數據。

況且佢近4次上陣對紐卡素3次有波入，狂o趙6球，當然唔會放過對手。撞啱紐卡素有正選門將告魯爾養傷，副選門將洛艾利洛停賽，38歲嘅夏柏連場邊熱身機會都唔多， 做箭靶啦！

廠仔作客4連勝
阿仙奴近11次聯賽交手得5勝5和1負。

兵工廠聯賽作客連贏4場，對上1次連贏5場係04年9月。

紐卡素對上10季收咧戰得1勝5和4負。

紐卡素首循環輸3:7，為球會史上首次英超單場失7球。