華拉倫加作客曳撐薩普斯堡

今晚挪超薩普斯堡主場迎戰華拉倫加，前者兩連敗兼失9球，慶幸對手華拉倫加又係「作客蟲」，今晚薩堡回師主場出擊有望贏波反彈，讓平半要2.03倍上盤。

讀者或者有疑問，薩堡主場4戰2勝1和1負，仲要防線穿窿場場失波，都唔係好醒啫，點解仲捧佢哋？事關薩堡箭頭馬奴斯奧臣同中場古蒙度杜拿連臣狀態托弗，近3場聯賽各入兩粒，除咗今晚進攻火力有保證外，更重要係華拉倫加作客夠差！

華拉倫加聯賽作客無論對住前列嘅侯格辛特、白蘭恩，中游嘅史達，抑或尾二嘅奧特格寧蘭全部輸晒，毫無還擊之力，至於唯一贏過嘅辛尼斯，如果唔係對方防線喺開波早段腳震震，6分鐘內連失兩球，佢哋係咪能夠取得開門紅都成問題，今晚薩堡有呢個「好幫手」，想話贏波攞晒3分有幾難。