賓約哥靠「武」鬥收復失地

歐聯今個周末就會舉行決賽，相信唔少球迷都非常期待，至於亞洲呢邊嘅亞冠盃亦都踢到16強次回合階段，今晚就有烏茲別克勁旅賓約哥主場決戰泰國代表武里南聯，小妹相信喺亞洲賽年年都有好表現嘅主隊可以收復首回合輸1:2嘅失地贏番場，2.25倍「讓主」博得過！

武里南聯入16強超額完成
喺亞冠盃嘅圈子入面，實力較次嘅泰國球隊往往淪為中東、東亞勁旅嘅陪襯品，武里南聯今屆可以破紀錄行到16強，已經算係超額完成。雖然佢哋喺首回合主場以2:1砌低咗賓約哥，但係畀對手拎到一個作客入球，都咪話唔大鑊，分分鐘就咁埋下出局伏線！

小妹並唔覺得賓約哥實力大超班，今屆戰績亦唔算太出色，分組賽只係贏過兩場咁大把，但論經驗就肯定贏晒喇，佢哋喺過去6屆賽事全部都最少打入16強，計埋上屆，更有兩次打入4強嘅經驗，況且呢隊波防守非常出色，6場分組賽只係失過3球，加埋今屆取得3個入球嘅烏克蘭前鋒比斯卓近況大勇，要揮低武里南聯，有幾難先？

首回合：賓客負1:2