FC北京俯「首」稱臣

亞冠盃16強次回合今晚開打，其中FC首爾返主場再遇FC北京。雖然雙方首回合踢成0:0，但北京日前喺聯賽有兩件主力連環受傷，今場左路隨時癱瘓，而且佢哋搏完「京津打吡」攰到爆，作客好難頂得住，1.42倍主勝值得熱捧。

最近FC北京高層似乎已經進退失據，原本佢哋為咗創造歷史，亞冠盃前例牌喺中超收起主力留力，點知日前對FC天津，因為聯賽戰績唔掂被球迷狂插，忍唔住強陣出戰，弊在最後以2:2打和失威不特止，更加有左翼王曉龍同左閘周挺更加分別傷出，代價認真沉重。

首爾聯賽改期養精蓄銳
據講王曉龍同周挺唔可以隨隊去南韓，意味北京今場要用中場雷騰龍串演後衞，雖然踢過西維爾嘅射手簡路迪，上場聯賽下半場中段已經被換走，不過佢近排狀態普通，唔似做到救世主，今季經常坐冷板嘅中場邵佳一，更可能連正選都冇份，點同首爾鬥呀？

另外，FC首爾當然開唔到北京咁高嘅500萬人民幣晉級獎金，而且首回合佢哋有前鋒伊斯古迪路傷出，中場崔孝真領紅牌，今場都有兩件主力唔踢得，但南韓足總為咗延續近年K-League喺亞冠盃嘅強勢，專登將首爾日前對全南天龍嘅聯賽改期，咁好關照，首爾梗係要交貨啦！

首回合：首客和0:0

亞冠盃賽制
採主客兩回合制，今輪為16強次回合。如法定時間內打和，先計算作客入球優惠，未分勝負將於次回合法定時間後加時30分鐘，再和則互射12碼決勝。