撐櫻花上盤屠「鯨」

大阪櫻花今晚喺日職主場對名古屋鯨魚，讓平半睇落唔夠狠，但上盤依然跟得過。日本國家隊尋日公布大軍名單，櫻花新王牌柿谷曜一郎又冇份，不過佢嘅師兄清武弘嗣同乾貴士，最近返咗櫻花跟操，清武今日仲撐場睇波，相信會激發柿谷嘅戰意「屠鯨」！

柿谷曜一郎爭上位
近年櫻花變成德甲球會寶庫，香川真司、乾貴士同清武弘嗣逐個走，今季佢哋又彈起個柿谷曜一郎，連多蒙特都話有興趣，可惜佢入選唔到日本國家隊，不過乾貴士同清武弘嗣返咗櫻花跟操，柿谷曜一郎見兩位師兄喺德甲風生水起，當然會騷哥厘博轉會，兼且提醒日本教頭沙哲朗尼下次預埋佢。

另一方面，鯨魚日前喺日聯盃以2:1砌低新潟天鵝，總算結束連續7場不勝頹勢，弊在教練史杜高域似乎已失去球員信任，堅持重用傷愈後冇料到嘅射手約舒亞堅尼地，冷落超級新星田中輝希更加被傳媒插到飛起，甚至有傳過佢會被炒魷，而且鯨魚已經連續8場唔能夠保持清白，好難頂得住柿谷曜一郎。