最強蜜蜂溫布萊殺「仁」

歐洲球壇頂級決戰今晚上演！多蒙特同拜仁慕尼黑今晚喺溫布萊球場爭做「歐洲一哥」，論聲勢，應季德甲冠軍拜仁當然佔優，但若論兩隊以最強11人一場過對決，分野又未必好大，多蒙特受讓2.12倍「讓球主勝」必捧！

如果季前公布今屆歐聯決賽係呢個戲碼，可能唔少球迷都話爆冷。不過當大家睇完兩隊4強點樣獵殺西甲雙雄，都會認同佢哋實力屬歐洲頂班。呢對德甲宿敵近3季已經9次交手，拜仁到今季先至攞到2勝2和，之前兩季5次對碰都係多蒙特贏晒，所以話邊隊剋住邊隊都好難講！

多蒙特上兩季交手5連勝
德甲亞軍多蒙特喺聯賽畀拜仁拋離25分，呢個差距顯示拜仁後備兵源冠絕聯賽。但依家決賽一場過，雙方最多都係得14個球員落場，唔會亦唔使留力，以多蒙特嘅正選班底同默契，絕對唔差得過拜仁。雖然中場馬里奧葛斯受傷無緣上陣，不過由於佢已經落實下季過檔拜仁，話無受到影響就呃你，佢唔踢未必係好大損失，而頂替佢做鎖匙人嘅馬高列奧斯，作用唔會差好多，假若佢想做未來多蒙特嘅大佬，就要趁今晚「騷哥利」喇！

拜仁決賽連環失利變包袱
拜仁喺2010年同2012年打入歐聯決賽都只得亞軍，呢個隨時會係一班球星嘅心理包袱。據聞拜仁賽前都狂操12碼，證明佢哋都有為法定時間內解決唔到多蒙特做定準備。畢竟兩隊知己知彼，好難再使出令人出其不意嘅戰術同絕技，難免踢得更小心謹慎，今晚90分鐘隨時分唔到勝負，多蒙特受讓咪抵玩囉！

筍盤：多蒙特