皇蘇唔赦艦隊 華倫地頭「大」晒

西甲剩番兩輪，皇家蘇斯達同華倫西亞同得62分，分列第4及第5位，雙方為爭最後一張歐聯入場券，肯定鬥個你死我活！今晚兩軍分途出擊，皇蘇贏晒剩低2場就可以第4名衝線，今晚佢哋喺主場迎戰皇馬值得睇好，博1.52倍「讓主」！另邊廂華倫亦喺主場迎擊CF格蘭納達，「蝙蝠軍」近7戰6場開大，今晚入波肯定唔會少，1.45倍入球大用嚟做過關膽就最啱喇！

皇馬立立亂士氣曳
皇家蘇斯達今季主場威力驚人，近14戰保持不敗之餘，連「作客王」巴塞嚟到都要擺低3分！前鋒阿基列斯同卡路士韋拿今仗雖然唔出得，但都仲有一對狀態大勇嘅後上王基沙文同皮亞圖孭飛，皇蘇鋒力仍然唔可以睇小。

對家皇馬家陣立立亂，莫連奴走人已成定局，班大帝仲點會同你搏命呀？咪忘記皇馬上星期喺國王盃決賽輸畀宿敵馬體會，對士氣造成一定打擊，今晚造訪非勝不可嘅皇蘇，莫講話開W，就算輸埋都唔奇啦！

格蘭納達發窮惡喪攻
暫時位列第5嘅華倫西亞，由於得失球差輸皇蘇一大截，搞到歐聯入場券爭奪戰嘅形勢相當被動，目前只可以畀心機贏晒餘下兩場，再望皇蘇失分。論狀態，華倫近5場波贏足4場，近6戰夾埋仲入咗足足18球添，超勁o架！尤其係前線靈魂人物蘇爾達杜腳風唔錯，5場比賽省咗6粒，今晚喺主場出擊，有力繼續數胡。考慮到格蘭納達仲未上岸，今鋪亦唔會放軟手腳，始終護級球隊發窮惡，分分鐘踢高兩班波，呢個亦係「張峰」揀入球大而唔吼「讓主」嘅原因。