今晚喺巴黎法國球場會上演法總決賽，由波爾多火併伊維恩，1.95倍主勝為不二之選。波爾多近年變咗褪色班霸，下季更受到重金打造嘅巴黎聖日耳門同摩納哥夾擊，要重振聲威難上加難，所以想過吓捧盃癮嘅話，今場對住季內雙殺嘅伊維恩，絕對係好時機！

（now714台周六凌晨3:00直播）

波爾多前鋒高法蘭喺冬季轉會窗改投紐卡素，一度令人擔心進攻力受削，猶幸迪亞巴堤乘勢崛起，呢位馬里射手喺對上兩輪法總有3球進帳之外，喺聯賽季尾階段更係球隊嘅入球泉源，收咧戰擊敗今仗對手伊維恩，就係靠佢梅開二度奠勝，今晚有佢繼續擔正數胡，加上後衞法拔同泰莫連拿斯雙雙復出，有前有後信得過。

相比起波爾多09年喺法甲封王，當年仲喺業餘第4級別角逐嘅伊維恩，喺班主財團Danone全力支持下，好似搭直通車咁連年升班，前季仲以法乙盟主身份升班，可惜嚟到法甲之後實力明顯有分野，打咗兩季都只係掹掹緊護級成功。再者佢哋今季兩循環都被波爾多砌低，大有格食格味道，就算隊長索連喺賽前發表奪冠宣言，想話激勵隊友爆冷捧盃，相信實際作用有限。

如法定時間內打和，將加時30分鐘，未分勝負則以互射12碼決勝。