西甲煞科，護級鬥餐死！馬略卡、切爾達、薩拉戈薩同拉科魯尼亞4隊只能活1隊，當中拉科今晚會喺主場迎戰皇家蘇斯達，主隊贏波就肯定護級成功，皇蘇就要搶晒3分爭踢歐聯，兩隊嘅目標都咁鮮明，勝負真係難料，不過兩軍近期入得又失得，「張峰」預期今場會係入球「大」戰，熱到得1.5倍都照捧啦！

（now633台周日凌晨3:00直播）

拉科魯尼亞現時排尾4，今場只要爭氣攞足3分，就唔使理人咁多，宣布護級成功。只可惜拉科今仗嘅對手係來勢洶洶嘅皇蘇，未必可以齋靠鬥志擊敗對手，最慘係拉科今季失球數字達69球，僅僅比榜尾嘅馬略卡少1球，防守能力信唔過係人都知，咁嘅情況之下，倒不如以攻代守仲實際。

好彩，拉科嘅鋒力一向靠得住，以老將華拿朗為首嘅攻擊組合今季表現唔算曳，整季入球數字（47球）喺聯賽屬於中游，加埋主場之利、目標鮮明，踢法一定較為進取，點會無波入先？

今季西甲奇兵皇蘇，上仗同皇馬合演一場節奏明快嘅攻防戰，雖然皇馬早早領先，甚至曾經手握2球優勢，但係皇蘇全場顯示出極強嘅爭勝心，攻到「銀河艦隊」抖唔到氣咁滯，最終完場前憑中場皮亞圖追和成3:3，搶番1分，今晚只要華倫失分就可以反壓對手上第4，不過大前提要自己贏到波先，所以皇蘇肯定大打進攻足球，中前場入波唔成問題，只係擔心後防成日輸大意波，入得又失得，今晚呢場關乎6隊波嘅生死「大」戰，一定係場入球騷喇。