西甲話題不嬲離唔開巴塞同皇馬，但今季唔可以唔提馬拉加，佢哋喺煞科戰作客巴塞意義重大，事關球迷會組團歡送主帥比歷連尼；一眾下季極有可能離隊嘅主將，亦希望喺魯營球場畫上完美句號。

馬拉加喺歐聯臨天光被多蒙特連入兩粒，球員勁嬲咁插歐洲足協指使球證玩針對，依家仲因為球會財政問題，要等UEFA下星期裁決佢哋來季嘅歐戰資格，喺咁關鍵嘅時刻，相信馬拉加眾將都唔敢放鬆，搏埋今晚先算。

主帥比歷連尼獲馬拉加省頒授金盾勳章後，隨即落實季後離隊，佢喺馬拉加德高望重，球員點都想用一場精彩比賽向佢表達敬意。同時，馬拉加球迷亦扮演住球會爭佳績嘅重要角色，呢班咁可愛嘅Fans，早前更宣布會夾錢包機組團去魯營，為愛隊打氣，難怪佢哋獲選為西甲最佳「第12人」啦！