德國嘅「阿美利堅之旅」嚟到第2站正係作客東道主美國，亦都代表領隊勒夫即將同推動「日耳曼戰車」改革嘅舊帥、現職美國領隊嘅「師傅」奇連士文重聚，小妹相信德國雖然冇咗9成主將，但絕對夠料同美國合力炮製入球騷，一於直取1.72倍入球大啦！

（無綫翡翠台及廣東體育周一凌晨2:30直播）

10年前仲用緊「高Q大棍」掛帥嘅德國，當年喺奇連士文領導下轉踢機動性高兼技術型足球，吸引咗唔少球迷眼球，奇帥早年轉教美國後亦都將呢套戰術體系融入球隊，成效都算唔錯嘅，佢哋近9戰只係輸過兩場，其中得兩場未能取得士哥，證明火力一啲都唔弱o架！

而且美國鋒線有丹普西同埋喺阿爾克馬爾表現出色嘅艾迪杜里壓陣，撞啱德國踢親國際賽都好易喺大比數領先下分心遭對手取得入球，去年對瑞典領先4球下遭扳平成4:4、上場對厄瓜多爾亦都由領先4粒下最後被追成4:2，美國要攻破對手大門並唔係難事。

「日耳曼戰車」雖然因為撞正拜仁要踢德國盃決賽、多蒙特大部分球員都因為踢完歐聯決賽冇耐未有歸隊，只可以繼續二線兵出戰，但相信各位球迷有睇「日耳曼兵」上場鬥厄瓜多爾都知佢哋嘅火力依然非凡，除咗梅開二度嘅普多斯基同拿斯賓達之外，老將高路斯、小將達斯拿等等都係射得之人，絕對有力延續近8戰有6場開大嘅走勢o架。

日耳曼兵團近8戰錄得6次勝仗兼入球大。 

德國近9戰6度至少攻入3球。  

美國近8戰開出5場入球大。

雖然德國冇晒一眾拜仁兵同埋絕大多數多蒙特球員，但睇佢哋上仗對厄瓜多爾嘅表現，就算係二線兵都展現出強大攻擊力，除咗普多斯基繼續有好表現，拿斯賓達亦都充分發揮到「後上王」本色取得「士哥」，以佢哋嘅火力冇理由搞唔掂連洪都拉斯都鬥唔過、冇咗主力射手當路雲嘅美國隊，1.93倍客W諗得過。