世盃外亞洲區第4圈B組大戰今日上演，日本喺主場對澳洲，和波已經夠數提早出線，極有機會連續3屆成為最早躋身世盃決賽周球隊，加上新國寶本田圭佑抱仔霸氣回歸，對住要搶分冇得玩守嘅澳洲，開1.7倍主W唔難！
（now671及672台、廣東體育周二晚6:30直播）
澳洲堅尼地 尼爾冇態
日本剛啱喺愛知縣以0:2慘負保加利亞，全隊喺鏡頭前好似灰到世界末日咁，呢場返到球迷最狂熱、需要加強警力防範出事嘅琦玉縣，肯定唔希望再失威。事實上，因為應付德盃決賽延遲歸隊嘅前鋒岡崎慎司，同埋獲准休息叉電嘅右閘內田篤人，今場都會復出，牌面強番好多。
最緊要係，本田圭佑尋日現身成田機場抱住囝囝霸氣現身後，晏晝已經會合日本大軍操練，而且佢拒絕回答傳媒提問，充滿煞氣想食咗澳洲咁，好可能發威。再講，澳洲中鋒約舒亞堅尼地傷愈後完全冇料到，隊長尼爾被FC悉尼放棄狀態亦唔慌好，硬碰硬好輸蝕。
黎巴嫩守「細」波抗南韓
A組焦點放咗係黎巴嫩主場對南韓，不過今場入波就唔似會太多。雖然黎巴嫩火力有限，但佢哋近7場有5場開入球細，又有効力FC山東嘅隊長安達喺中場話事，同埋諾高平門將阿巴斯哈辛把關，唔似會畀人任數，特別係南韓冇選射手朴主永，中場具滋哲同寄诚庸，冇咗外流3寶好難開入球騷，捧1.9倍入球細。
（now671台周三凌晨1:30直播）
