烏拉圭今晚喺主場迎戰法國，雖然呢場只係熱身賽，但烏拉圭就精銳盡出，事關佢哋幾日後就要緊接出戰世盃外同洲際盃，教頭泰巴尼斯當然要趁機作最後調整，反之本來試陣味濃嘅法國，仲輪住有國腳受傷退隊，雙方無論戰意、陣容都係一個天一個地，主勝有2倍值博吖。

（廣東體育周四凌晨3:00直播） 

烏拉圭繼續有防線鐵膽盧根奴同高甸合作扼守中路，右閘馬田卡沙利斯自三月因車禍錯過兩場世盃外後再度入選，防守力進一步升呢，唔係咁易咬得入o架。中場方面，基斯甸洛迪古斯、加根奴等一眾外流兵都入選大軍名單，擔任串連同掃蕩工作，講到鋒線，烏拉圭更加可以用得人驚嚟形容，事關佢哋除咗有今季意甲神射手卡雲尼同老而彌堅嘅科蘭，重心人物蘇亞雷斯被英格蘭足總重罰停賽10場後，喺利物浦齋操冇份踢，今次難得落場，肯定砌盡發洩！

對家法國啱啱遇着傷兵潮，繼禁賽逾年後再獲重召嘅拿斯尼，因為膝傷提早返歸，箭頭文尼斯同後衞基捷基治亦分別受背部同腹股溝傷患纏身退隊，領隊迪甘斯補選嘅加連尼亞、拿卡錫迪同泰莫連拿斯，連同防守中場古拿禾古同後衞文加拉全部係生牯仔，加上艾拉、列貝利兩件主力又冇入選，靠班「高盧雞仔」擔大旗，可以有乜作為﹖