U21歐國盃今晚勁爆開鑼，而且有英格蘭U21對意大利U21嘅A組大戰上演！至於明晚，就有「死亡B組」嘅冠軍熱門西班牙U21、德國U21同荷蘭U21登場。講番英格蘭U21，佢哋未開波已經有主力輪流受傷，意大利U21讓平半照捧上盤！

（now633及635台周四凌晨2:30直播）

英格蘭U21最近贏到開巷，表面睇好似幾威，不過領隊皮雅斯領軍能力成疑，上屆英格蘭U21喺分組賽得2和1負恥辱出局，大家仲記唔記得？仲有除咗韋根中場卡林麥馬拿文同修咸頓後衞榮基梳爾因傷冇入選，開波前英格蘭U21仲有熱刺中場安祖斯唐辛懷疑非法賭波被迫退隊，認真閉翳。

更慘嘅係，即將外借期滿正式加盟曼聯嘅翼鋒韋費特沙夏，因為喺英冠升班附加賽為水晶宮帶傷搏殺未好番晒，今場踢到幾多分鐘都未知。唔好忘記，家陣英格蘭U21前線上得新特蘭嘅域咸、阿士東維拉嘅迪爾科尼素同保頓嘅蘇杜爾可以選擇，假如韋費特沙夏又要帶傷頂硬上，又邊會輕易入到波？

另一方面，意大利U21教練文基亞上任前主要執教低組別球會，用開嘅球員好少係大球會冷板貨，反而唔少係中下游球隊嘅主力成員，例如外圍賽攻入6球嘅射手加比亞甸尼，今季意甲就有6球進帳。再講，効力利物浦嘅前鋒波連尼可以提供有用情報畀隊友，有佢做無間道爆料，意大利U21贏埋唔出奇。