朝世盃南美洲區外圍賽焦點戰，梗係排榜首嘅阿根廷主場迎戰第3位嘅哥倫比亞，雖則話主隊「球王」美斯預計只會擔任後備，但由阿古路、希古恩同拿維斯組成嘅「三叉戟」火力依然驚人，要撕破由37歲老將耶比斯統領嘅哥隊防線應該易如反掌，力奇捧2.3倍「讓球主勝」，博佢哋大勝！

（有線61及201周六早a上6:05直播）

阿根廷主帥沙貝拉今次點兵可謂精銳盡出，雖然中場加高最終因傷唔踢得，「野獸」泰維斯落選，但整體實力依然係世界頂級。冇錯，沙帥話明即使美斯傷患進展理想，暫時都唔想佢冒險，頂盡會下半場先用佢，但以「藍白軍」喺之前11場分組賽轟入24球，平均每仗入2.18球嘅火力，就算「球王」唔踢都冇乜好驚！

要知道，阿根廷今屆外圍賽嘅首席射手唔係美斯，而係希古恩。呢位皇馬射手已經話明想離開「銀河艦隊」，今鋪梗係要博表現希望可以搵個好人家接收佢啦！至於佢兩個拍檔阿古路同拿維斯都係技術同把握力出眾嘅射手，三箭齊發使驚冇波入？

哥倫比亞目前排第3睇落幾巴閉，10戰失7球嘅防線仲要係全南美最佳，但要知道今屆南美洲區少咗隊決賽周主辦國勁旅巴西，哥隊少失波有乜出奇？睇番佢哋首循環主場對阿根廷都輸1:2，條防線唔似信得過！再講，佢哋前線只靠法卡奧單天保至尊，畀唔到主隊太大威脅，領隊柏加文以前教阿根廷嗰陣，都唔見得有咩本事，今鋪領軍倒戈祖國，睇怕都係要乖乖送上3分，輸少當贏啦！