今晚係世盃外圍賽之夜，歐洲區A組「一哥」比利時喺主場恭候塞爾維亞。比利時陣營星光熠熠，費蘭尼、賓迪基、美拿拉斯、丹比利、夏薩特同高柏尼今季都喺英超發熱發亮，對住天殘地缺嘅塞爾維亞，仲唔食「塞」咁食？（五）13個2.45倍「讓主」值博！

由名將韋莫斯領軍嘅比利時，家陣揸住16分並以較佳得失球力壓克羅地亞坐喺A組榜首，表現勁對辦，踢緊熱刺嘅守將維頓漢賽前就話，當今球壇只得西班牙同德國勁過佢哋，睇得出一班球員自信心爆棚喎！

查實維頓漢咁大口氣係有原因嘅，畢竟比利時幾件主力都係英超星級戰將，就連「新魔獸」盧卡古都喺今季爆發，外流去俄超嘅全能中場韋素又愈踢愈好，既然首循環作客都可以炒起塞爾維亞3蛋，今鋪返到主場勝算梗係更高啦！

況且揸住7分位列小組第3嘅塞爾維亞唔單止實力差一截，今仗仲要陷兵荒，中場連高域、翼鋒蘇蘭托錫同前鋒菲臘杜歷錫齊齊倦勤，後防最穩陣嗰件拿斯達錫都話要停賽，隨時輸鑊甘都似。