國足4大主力復出都唔夠砌

中國今晚轉去北京迎戰實力比上周對手烏茲別克更強大嘅荷蘭，雖然話有以鄭智為首嘅4大主力齊齊復任正選，但限於實力恐怕都係難逃一敗。特別係以荷蘭嘅超強火力讓波都冇難度，今場捧1.92倍「讓客」冇衰。

（無線明珠台及中央5台周二晚8:00直播）

尹佩斯孭飛踢爭氣波

世界排名95嘅中國，論實力同第5位嘅荷蘭差幾多，相信都唔使力奇多講。咁究竟中國又有冇機會爆冷呢？雖然國足係有主場之利，但上周佢哋對烏茲別克都係先開紀錄結果倒輸番轉頭，家陣對手係勁唔知幾多倍嘅「橙衣兵團」，地利優勢自然所餘無幾。的而且確國足今場有守將張琳芃、門將曾诚傷愈，不過狀態有幾多其實好難講，孫祥同鄭智雖然都話經已歸隊，但呢兩位大哥都已經過晒高峰期，靠佢兩個就想贏世界級嘅荷蘭似乎天真咗啲！

「橙衣兵團」方面，雖則話有部分主力被抽調去踢U21歐國盃，不過呢班大國腳上一站作客印尼依然輕鬆贏咗3:0，施安迪莊、史奈達同洛賓等表現都好搶鏡，但英超神射手尹佩斯當日反而屢誤戎機，相信佢今鋪會想踢番場爭氣波，以呢個星級陣容鬥國足，贏兩粒又點會係難事呢？