U21歐國盃B組今晚上演西班牙大戰荷蘭呢場重頭戲，雖然兩軍都已經篤定出線，但必須贏波先可以確保小組首名席位，兩隊冇可能唔出盡力搏殺！「小橙衫軍」作為今屆賽事火力最強橫嘅球隊，極有可能逼到「小狂牛」加快節奏同佢玩鬥攻，1.77倍入球大信得過！

（now633及635台周四凌晨0:00直播） 

衞冕冠軍西班牙U21今屆踢法似乎學足一班大國腳，唔求大炒只求控制大局穩陣贏波，結果頭兩場波雖然中場能力遠勝俄羅斯同德國，都只係小勝1:0，球迷難免睇到恰眼瞓嘅。不過今仗對手荷蘭踢咗兩場賽事，已經入咗八支參賽隊伍中最高嘅8球，證明鋒力有保證。

除咗天才中場雲堅基爾領導嘅中場線有力同「小狂牛」一搏，韋拿杜姆、利萊費亞同埋盧克迪莊個個都係射得之人，有力撕破西班牙防線之餘，亦都可以逼到班「小狂牛」冇得慢慢搓，要加快進攻節奏。問題係荷蘭防線唔算穩陣，入得又失得，兩場分組賽夾埋失咗3球，以艾斯高、堤亞高艾簡達拿呢班一線鬥牛球星嘅水平嚟講，絕對有力同「小橙衫軍」合演一場精彩「大」戰！