世盃非洲區外圍賽第2圈F組今晚有兩場好戲上演，如果頭場馬拉維失分，尾場尼日利亞只要作客砌低納米比亞就有機會提早出線殺入第3圈。「超霸鷹」鬥志唔成疑問，最重要係納米比亞喺賽前兩日爆出主帥彭格蘭收到死亡恐嚇憤而辭職，主隊家陣立立亂，想唔輸都難，梗係捧尼日利亞1.55倍客勝啦！

（開賽時間：周四凌晨3:00）

「超霸鷹」目前以4戰得8分排喺F組榜首，帶離次席馬拉維2分，由於只得首名可以出線，邊使驚佢哋唔搏命？更何況佢哋嚟緊要踢洲際國家盃，當然想盡早鎖定第3圈席位，梗係谷起狀態砌到盡啦！

冇錯，佢哋主帥基舒今次點兵以大批土炮為重心，陣內真正有名氣嘅就只得車路士中場約翰米基爾，其餘好似快翼域陀摩西斯就因傷缺陣，名將馬田斯、奧丹維治同尤保都冇入選，但查實「超霸鷹」今年2月贏非國盃都係靠呢班土炮齊心團結，創造奇迹奪標，力奇覺得冇大牌球星佢哋踢得仲好，今仗一樣對尼日利亞嘅人腳充滿信心。

納米比亞呢邊，瑞典籍主帥彭格蘭上任6星期就突然唔玩，原因係佢同屋企人都收到死亡恐嚇，結果佢上星期領軍造訪馬拉維後，就即刻劈炮。納米比亞今仗會由助教文納迪同卡拿尼奧合作領軍，臨陣易帥軍心混亂，主力前鋒保迪斯又話有傷唔踢得，今鋪就算有地利，都一樣信唔過啦！

今輪為第2圈賽事，分10組進行雙循環比賽，每組首名進身第3圈。

非洲區F組