嗰頭球季完咗冇耐，呢頭「張峰」又同大家見面喇！4年一度嘅洲際國家盃今晚喺足球王國巴西揭開戰幔。上兩屆盟主兼明年世界盃東道主巴西，第一擊喺巴西利亞迎戰亞洲冠軍日本。啱啱轉會去咗巴塞嘅「森巴球王」尼馬，再次被國民視為國家隊希望，對住實力低一個檔次嘅日本，仲要地頭出擊又點可以失威呀？一於撐巴西大勝一場開1.72倍「讓球主勝」啦！

（無綫翡翠台、明珠台、高清翡翠台及中央5台周日凌晨3:00直播）

或者有朋友認為洲際盃係雞肋，重要性比唔上世盃，啲強隊未必會去盡，但睇番巴西參賽6屆入面有3屆奪標，就知無論邊一代嘅「森巴兵團」，踢親呢項賽事都搏晒命！早前巴西名宿「白比利」薛高公開表示，現時巴西陣中太多新人，所以2014世盃會睇好宿敵阿根廷喎，睇怕「人氣王」尼馬同一班手足，今場都會以行動嚟回應喇！

事實上，巴西陣中有侯克、奧斯卡杜斯山度士、大衞雷斯同丹迪等喺歐洲大球會搵食嘅經驗戰將，整體實力有晒保證，加上等緊上位嘅幾個新貴，為討好「大菲」領隊史高拉利歡心，入選下年嘅世盃大軍，落到場實搏到盡。賽前傳畀熱刺睇中、身價去到1,700萬歐元嘅巴西中場荷西保連奴，練波嗰陣扭親右腳，馬上要响場邊敷冰，好彩檢查後並無大礙，唔影響佢今場披甲，巴西無論戰意同實力都唔使擔心。

由名帥沙哲朗尼領軍嘅日本，對今次賽事態度認真，大部分外流球員都喺名單之上。佢哋近年愈嚟愈多球員外流歐洲球會，實力已經同世界接軌，可惜由於本田圭佑剛啱先至傷愈趕及披甲，亦有傳佢之前做完矯視手術後有後遺症，夠唔夠態成疑問，或會令日本嘅戰鬥力打折扣，唔怪得遠藤保仁尋日練完波之後，一條友苦練死球，佢話靠Free Kick先開紀錄，係唯一偷雞方法喎。

況且佢哋打完世盃外圍賽對伊拉克場波，就山長水遠飛咗12,000公里，屈响架機15粒鐘至嚟到巴西，話唔謝係呃你嘅，好難第一擊就反客為主，揭幕戰放心支持主隊巴西啦！

兩軍近6次交手，巴西取得4勝2和。

兩隊連續3次對賽都開「半場大」。

巴西連續6場比賽不敗。

上屆冠軍巴西喺自己地頭出戰，肯定要喺一眾鄉親面前響頭炮。對手日本亦唔係擅守嘅球隊，而且有一定反擊能力，相信呢場揭幕戰應該會出現唔少入球。睇番紀錄，兩軍連續3次交手，踢咗半場就出現2個入波，嫌「入球大」得1.57倍冇肉食，不妨進取啲要2.29倍嘅「半場大」。