森巴足球係日本足球嘅「祖師爺」，巴西今晚同日本喺洲際國家盃揭幕戰交手，有望畀多啲入波球迷睇喇！

今屆賽事用波叫「CAFUSA」，意思係「森巴足球嘉年華」，呢個波係以綠色同黃色為主色，上面仲有巴西國旗嘅南十字星座圖案添，森巴味爆晒燈。日前巴西總統更開腔，叫一眾國家隊成員畀心機，要向全世界證明佢哋有能力舉辦明年世界盃喎。正因為咁，巴西上場熱身賽已經開足Turbo炒法國3粒，扭轉近3年遇強不勝嘅劣勢，依家當然希望食住個勢，踢一場酣暢淋漓嘅揭幕戰，入多幾粒報答球迷啦！

至於有過半數主力球員喺歐洲聯賽搵食嘅日本，依家唔再係普通配角，佢哋嘅歐戰經驗豐富，表現值得期待。「東瀛兵」一向以巴西為師，今仗一於有前冇後，入波大激鬥啦！