親身去睇國際賽感受現場氣氛，係唔少球迷嘅夢想，但唔止要面對交通費，酒店價錢仲貴到嚇死人，不如睇吓Sherry今日同大家介紹嘅「10人瘋狂睇波團」有咩慳錢好橋啦！
話說Henrique Lima呢位嚟自巴西嘅超狂熱足球粉絲，由2006年德國世界盃起就同班Friend不停穿梭各國睇波，到2010年世界盃後，佢哋更加度咗條慳錢又舒服嘅睇波好橋，就係搵班好知音一齊坐架巨型旅行車周圍去，咁就唔使擔心住宿同交通費嘅問題啦！
設備齊全有埋電視微波爐
Henrique同9位朋友齊齊由2010年世盃結束後開始儲錢，諗住搵今年喺自己國家舉行嘅洲際盃同埋下年嘅世界盃試行「大計」，到今個月初終於買到一架有12張床、2部電視、雪櫃、微波爐甚至遊戲設施嘅超豪大巴，再請埋2個司機輪流揸車去勻比賽場館，「10人瘋狂睇波團」終於成行！
唔好以為呢班咁喪嘅球迷全部係「廢青」，實情佢哋當中有3位係商人、7個係律師，暫時放棄事業睇波完全係為咗呢個足球夢。據知佢哋喺啱啱過去嘅周四出發，並會喺賽事期間穿梭最少6,000公里，去到位於巴西利亞市、累西腓、福塔雷薩等6個城市嘅場館觀賞賽事，家陣仲密谋睇埋2016年奧运同2018年嘅俄羅斯世界盃，真係羨慕死人喇！
洲際盃A組
