阿甲 朝又有好戲上演，拉魯斯喺主場對河床，平手值得吼實。雖然拉魯斯嘅爭標形勢比較被動，但佢哋近4次主場對河床有3次贏波，當然唔會怕對方，更何況河床嘅射手查斯古特未傷愈，中場蘭仙尼又成為羅馬收購目標，士氣未必好要唔過。

（開賽時間：周一早上8:30）

目前拉魯斯落後榜首嘅紐維爾舊生6分，但少打1場，即使反先難度比較大，相信都唔會喺主場扯白旗。當然，拉魯斯連盃賽近8場得1勝5和2負，近況的確唔多掂，只不過佢哋得後衞卡路士阿拿奧祖需養傷，有條件反彈贏波。

另一方面，河床現時距離榜首嘅紐維爾舊生3分，形勢上要搏命搶分，和波對佢哋都冇着數，問題係河床連盃賽近4次作客拉魯斯得1勝3負，期間3次輸波連1球都入唔到，呢場作客焗住要駁火，好容易出事，唔使讓都咪掂。

事實上，河床最具爭標經驗嘅法國射手查斯古特仲未好番，冇個有卡士球員壓陣，關鍵時刻失分唔出奇。除此之外，今季有5個聯賽入球嘅阿根廷新星蘭仙尼，傾咗好耐加盟羅馬仲未搞得掂，掛住轉會好難集中精神比賽，吼實對家好過。