東道主巴西喺揭幕戰3:0輕取日本，香港球迷個個話勁！但巴西國民又收唔收貨呢？今日《老友傾波》「四眼哥」搵嚟曾執教飛馬、晨曦同廣東日之泉的巴西教練列卡度，同各位讀者傾波。

雖然「森巴兵團」近年令不少支持者多次失望，但今屆洲際盃頭威頭勢「三蛋」K.O.日本隊，作為巴西人，列卡度又點睇呢？「巴西首仗的確表現唔錯，但同過去稱霸世盃比較仲有一大段距離，不過見到國家隊踢出良好攻守組織，球員都有唔錯發揮，相信好多巴西人都同我一樣係滿意嘅。」

球員當中，幾乎個個都話新星尼馬係贏波最大功臣，但喺列卡度眼中卻另有其人：「尼馬係新星，亦係巴西球迷公認嘅未來國家隊支柱，但佢喺對日本場波，除咗射入球世界波，其餘時間嘅表現就同身價唔多相稱。我反而覺得奧斯卡杜斯山度士先係最大功臣，佢踢法聰明、轉數又快，喺選擇自己突破定係同隊友合作嗰陣，決定得快又準，閱讀球場嘅能力，令人聯想到全盛時期嘅卡卡，甚至李華度。」

經過頭一輪賽事檢閱後，列卡度預期不存任何爆冷機會，勢必由兩大熱門巴西同西班牙躋身決賽：「身為巴西人都冇辦法唔稱讚一下西班牙，大家仲記唔記得佢哋保持咗高水準表現同良好戰績幾耐？慶幸巴西領隊史高拉利係有料教頭，或者有球迷認為佢嘅戰術踢法唔夠悅目，但現實話畀大家知，要做冠軍球隊，只靠悅目根本唔可能。」

從電視直播所見，比賽球場質素麻麻，令人擔心明年世盃嘅情況會唔會一樣︰「唔止球場質素差，洲際盃開始後，球迷同傳媒都發現好多問題，但畀人見到證明主辦當局冇諗住去隱瞞，咁先有機會解決到啲問題。離世盃仲有一年，我相信到時情況會好好多。」

原來並非每一個巴西人都為舉辦洲際盃同世界盃雀躍，大部分更為此憤怒：「我哋都希望國家隊重拾昔日光輝，但同樣希望可以過安穩嘅生活！巴西稅率好高，但罪案率更高！我哋畀咗稅，但生活差、治安差，人民不滿已經去到一個好危險嘅地步。政府畀唔到生活保障人民，仲用咗好多錢去起球場、搞世盃，實在好難令人接受！」不過，正積極聯絡希望重返香港執教嘅列卡度表示，民怨還民怨，只要見到國家隊登頂，天生樂天嘅巴西人，自然會將不快事拋諸腦後。