今晚世青盃有B組嘅尼日利亞U20惡鬥葡萄牙U20，雖然「小葡兵」嘅名氣較響，但佢哋近排嘅戰績實在不堪入目，相較之下尼日利亞雖然主要起用「土炮」，但佢哋已經連續4屆世青盃打入16強，面對強敵有力保住不敗，受讓之下，1.82倍「讓主」值得追捧。

（TVB網絡電視02頻道、now 810台周六凌晨2:00直播）

葡萄牙睇牌面的確唔弱，除咗兩位巴塞青年軍阿高斯天奴卡及艾格米基爾，盛傳成為利物浦羅致目標嘅士砵亭後衞泰亞高艾羅尼亦都係骨幹，之不過佢哋近排嘅戰績的確唔多理想，唔止已經連續8場贏唔到，近6戰都有失波證明防線唔多穩陣，就連最後一場熱身賽對住美國嗰陣都輸1:3，又真係好難有信心喎。

至於尼日利亞陣中雖然個個都係名不經傳嘅小將，僅有嘅3名外流兵中除咗奧拉坦米高之外，其餘都只係効力較次級嘅聯賽，不過佢哋喺非青賽中表現出色，最後更奪得第3名，今次以大部分原裝班底出戰世青盃，仲有非青盃神射手烏馬爾壓陣，要射穿葡萄牙條防線應該唔難，今場有力保住不敗。