洲際國家盃上演A組榮辱之戰，日本喺A組對墨西哥表面上冇嘢好爭，實情兩隊都要搏命避免羞家3戰全敗，而且日本有隊長長谷部诚停賽，防線更加靠唔住，呢場「曼聯內戰」由香川真司對「小豌豆」查維亞靴南迪斯，玩1.95倍入球大最穩陣。

（無綫明珠台周日凌晨3:00直播）

由於兩隊同樣連輸兩場篤定出局，令人感覺今場好似季軍戰，專登踢守勢波博和根本冇意思，贏番場起碼都有番少少面子。事實上，日本喺沙哲朗尼執教下，開始高舉進攻足球旗幟，中前場得隊長長谷部诚最肯協防，遠藤保仁只係近似派路嘅墮後角色，佢哋喺亞洲的確係超晒班，但遇到其他洲份嘅強隊，就好易畀人打爆。

至於外流主力包括本田圭佑、香川真司、岡崎慎司同清武弘嗣，平時頂多係做吓樣幫手，根本冇乜搶截能力，如果唔係，日本對巴西同意大利就唔會夾埋失7球咁慘烈，加上門將川島永嗣及中堅吉田麻也輪流孭鑊，令後防球員出現信心危機，以及領導能力最強嘅長谷部诚停賽呢個致命傷，好難相信佢哋可以突然反彈保持清白。

雖然墨西哥對意大利同巴西，只係靠查維亞靴南迪斯射入1球12碼，但今次佢哋強陣出戰，絕對唔係抱住遊埠心態去巴西，對住日本嘅穿窿防線，肯定會把握機會踢爭氣波。再睇日本輸畀意大利後，當選最佳球員嘅香川真司又係灰到唧都唔笑，有理由相信佢會繼續嚟料同紅魔隊友查維亞靴南迪斯搏過，一於玩入球大！

日本近7場得1次保持清白。

日本對上2次畀對手攻門26次。

墨西哥近3次對賽全勝。

墨西哥對巴西控球比率有49%。