眨吓眼，洲際國家盃已經完成咗兩Round分組賽，睇咗咁多場大家有咩感覺？「四眼哥」今日搵嚟相識超過十年、有「港甲浪人」之稱嘅「亨利」，同大家傾波。

因為洲際盃喺巴西上演嘅關係，所以頭場都成香港時間凌晨3點先開波，「四眼哥」年紀大2點就眼瞓，所以開鑼以嚟直播淨係睇過揭幕戰，但估唔到連「夜鬼一族」嘅「亨利」都話頂唔蒲：「嘩！個開波時間真係有啲『kick』，睇完頭場尾場未開已經瞓着，睇嚟出年世界盃真係要諗諗計，搞多啲朋友聚會，邊玩邊睇波先得。」

講番波，「亨利」睇完兩輪有兩隊嘅演出令佢好感動：「雖然大溪地兩場輸咗16球，但佢哋職球員嘅態度同精神，非常值得尊重，尤其第一場當我睇到佢哋破蛋，真係好感動。」至於另一隊，相信大家都估到：「亞洲代表日本竟可以逼到世界盃盟主意大利全軍退守喺禁區入邊，雖然最後輸咗，但試問以後仲有無人敢睇小日本？起碼意大利唔敢先囉！」

「亨利」對同樣喺新一季轉會嘅巴西球星尼馬，給予極高評價，深信巴塞隆拿冇入錯貨。不過，佢對巴西國家隊嘅人腳就有啲意見：「尼馬係好，孭到飛，不過佢啲拍檔無論係侯克、奧斯卡杜斯山度士定費特，同佢好似冇太大化學作用，一旦尼馬失準點算？所以我認為領隊史高拉利，喺洲際盃之後要檢討，同重新選番幾件『大牌』入伍，好似善於後上嘅柏圖，同中場派牌嘅卡卡，絕對可以幫到尼馬、幫到巴西。」