巴西同意大利果然喺洲際國家盃A組順利提早出線，令最後一輪成為例行公事，不過，森巴兵團要用勝利洗刷國家嚴重嘅內憂問題，球員戰意鮮明，畀日本踢到殘晒嘅意大利今次有難喇！

雖然「森巴兵團」今屆連勝日本同墨西哥贏盡球迷掌聲，但係唔滿意政府嘅示威者亦都愈嚟愈激，搞到條街濃煙密布、烈燄熊熊，仲要擺明喺開幕禮勁噓去落巴西總統面，面對呢股反對浪潮，巴西球員唯一可以做嘅，就係爭取贏波氹國民開心。

喺上屆踢完分組賽就打道回府嘅「藍衫軍」意大利，雖然今屆未有失威，但係表現就冇乜說服力，尤其係畀日本踢到失魂落魄，雖然最終贏波，始終都大傷元氣，何況佢哋踢大賽一向慢熱，呢場Hea吓回一回氣，留力踢4強賽仲實際。