洲際盃4強今晚演「南美內訌」，東道主巴西迎戰烏拉圭。巴西喺分組賽展現出強大鋒力，「新球王」尼馬仲揚言要隊幾粒，為怨聲載道嘅巴西國民帶嚟歡樂！對家烏拉圭上仗收起進攻主力，擺明決心硬撼「森巴軍」，好易出現大手交易，撐1.62倍入球大！ 

（無綫翡翠台、明珠台及高清翡翠台3:00直播）

巴西嘅百萬人示威愈演愈烈，作為「森巴軍」首席球星嘅尼馬，對於政治同民生問題雖然愛莫能助，但就表示會用足球為人民帶嚟快樂：「我知依家巴西民怨四起，我哋作為國家隊成員唯一可以做到嘅事，就係將勝利同入波帶畀球迷！」咁有心，難怪「森巴兵」練波嗰陣吸引咗近50名球迷喺場外守候，部分人仲大叫：「史高拉利，開門啦！」雖然「大菲哥」冇完成班粉絲嘅心願，但睇見「巴粉」咁有心，相信眾將都會踢番場好波嘅。

事實上，尼馬喺今屆洲際盃弗到冇朋友，場場入靚波，巴西今仗亦繼續會以「新比利」為核心，配合費特同侯克，大踢進攻足球！雖然當紅炸子雞、後備前鋒班納特安尼斯奧練波嗰陣受傷，今晚未必落場，不過中場新星荷西保連奴同後防重心大衞雷斯嘅傷勢都冇大礙，有呢兩位後上殺手壓陣，巴西唔愁冇波入。

對家烏拉圭一樣係喪攻之流，科蘭+卡雲尼+蘇亞雷斯三大殺手同時出擊，威力唔講得笑！尤其係「哨牙蘇」，呢位紅軍射手上仗對大溪地只係後備上陣，但臨尾10分鐘就勁省兩粒，榮升國家隊史上第一射手，上仗對住意大利連失2球嘅巴西，真係未必頂得住呢位「超級射手」o架！咪忘記烏拉圭近3次同巴西碰頭全部開大，何況响1950年世盃，烏拉圭就係喺「聖殿」馬拉簡拿球場以2:1擊敗巴西封王，雖然事隔半個世紀有多，不過森巴兵就講到明要有仇報仇，有乜法子唔「大」打出手吖！

巴西近7場比賽6仗開出「入球大」。

連熱身賽，巴西已錄得9戰不敗佳績。

兩軍近6次交手，巴西取得2勝4和。

賽制：法定時間賽和即加時30分鐘，再和則互射12碼決勝負。