睇完巴西喺洲際盃決賽大炒西班牙嘅精彩演出，大家可能覺得唔夠喉，想睇多啲巴西波， 朝場南美超級盃首回合就有聖保羅喺主場與哥連泰斯合演「巴甲內訌」喇！可惜呢兩班波火力唔多掂，難以上演入球騷，1.62倍入球細就夠晒穩陣。

（開賽時間：周四早上8:50）

唔好以為巴西國家隊崇尚進攻足球，聯賽就一定多波入，例如呢場波嘅「主人家」聖保羅已經連續4場開出入球細，近4戰只係得1球進帳，早幾日對法林明高嘅熱身賽亦都輸0:1，難望喺短時間內操起狀態，隊中唯一入選巴西大軍嘅謝臣喺洲際盃未上過陣，亦一向唔係主力得分手，就算有路爾斯法比安奴鎮住條鋒線，都好難靠佢「單天保至尊」。

至於哥連泰斯喺上月初段嘅賽事亦都出現啞火之勢，連續7場開出入球細，每場最多亦只係入到1粒，直到依家抖咗成個月，狀態未足，火力又點會有提升先？

更重要嘅係中場主將保連奴已經畀熱刺挖角，亦都講明因為要搞轉會手續，無緣為「哥軍」上演最後一戰，冇咗佢喺中場掃蕩同組織攻勢，睇怕哥連泰斯嘅火力會更受打擊，想唔開「細」都幾難喇。

採主客兩回合制，今輪為首回合。兩回合計打和，將加時30分鐘，再和則互射十二碼決勝。