加納U20喺今屆世青盃死過翻生，仲連爭標熱門之一嘅葡萄牙都畀佢哋砌低埋，家陣呢粒「小黑星」信心爆晒棚，大國腳領隊卡華斯艾比亞又話明會到場揀蟀，今晚喺8強惡鬥智利U20，加納呢班生牯仔仲唔加多兩錢肉緊博表現咩？一於博2.95倍主W。

（TVB網絡電視01頻道及now801台周一凌晨2:00直播）

分組賽頭兩戰全敗嘅加納，原本瀕臨出局邊緣，但跟手就大炒美國4:1以4支最佳第3名隊伍之一嘅資格出線，16強仲以3:2淘汰埋葡萄牙，表現一場比一場好，怪唔之連加納國家隊教頭卡華斯艾比亞都睇好呢班小朋友，佢老人家今屆賽事場場跟到足，除咗開名話會帶埋守將艾度巴巴同前鋒耶當保亞基去巴西踢世盃決賽周之外，仲話會提拔多幾位小國腳，淨係呢點都足以推動班球員踢好波啦！

對家智利U20喺當地時間禮拜四由貝沙出發，搭咗4粒鐘郵輪抵達今戰地點伊斯坦布爾備戰，教練馬里奧沙拉斯賽前猛咁話加納難應付過16強對手克羅地亞，梗係啦！智利玩開小組入滲，對住個個地盤佬咁款嘅加納守將，唔忌就有鬼啦！況且智利防中施巴斯坦馬天尼斯要停賽，想頂得住加納嘅來襲都幾難！