美洲金盃向來係美國同墨西哥嘅世界，過往11屆合共包辦10次冠軍外，最近3屆決賽更係「美墨對決」。雖則有以上風光史支持，惟慣以強陣應戰嘅墨西哥，領隊荷西托尼今次點兵竟然放棄「傳統」，改以土炮副選陣容參賽， 朝A組首戰面對巴拿馬勢難睇好，力撐巴拿馬2.22倍「讓客」。

（有線61及201周一早上8:00直播）

筆者睇見墨西哥大軍名單已經唔開胃，莫講話查維亞靴南迪斯、杜斯山度士同古亞達度呢班「正規軍」冇份，實情連早前洲際盃所有國腳亦唔見人，目前陣容全以國內球員組成，馬基斯盧高算係最有經驗嗰個，但呢位三十出頭嘅瓜達拉哈拉前鋒只得11頂「喼帽」，就知呢班國腳係咩貨色。再者墨西哥喺世盃外中北美洲區6戰1勝5和，火力弱爆入得3球，領隊荷西托尼早已備受質疑，球迷亦不斷要求佢落台，今次弱陣戰金盃，隨時成為呢位主帥嘅「催命符」。

巴拿馬雖然冇咩出名球星孭飛，但勝在對金盃重視程度遠勝對手，領隊迪利華迪斯召入加比爾托利斯等核心人物外，仲Call埋施斯里奧禾達文、巴拉斯佩雷斯等外流球員，儘管後者未趕及歸隊，但睇番巴拿馬自從05年金盃摘取亞軍，過後3屆全部成功闖過分組賽入8強，上屆更力壓美國首名晉級，實力不容忽視。

美洲金盃賽制：12隊分3組，每組4隊進行單循環比賽，每組首、次名，以及兩支最佳小組第3名將躋身8強。