朝金盃C組有主辦國美國迎戰中美洲小國伯利茲，論實力，伯利茲嘅世界排名雖比大溪地稍高，但美國嘅實力對佢哋嚟講依然遙不可及，小妹相信東道主可大勝一場，就算讓兩球都照捧1.65倍「讓主」！

（有線61及201周三早上11:00直播）

相信唔少球迷都會問，究竟伯利茲係乜東東？呢個僅得33萬人口嘅小國其實只係立咗國不足32年，據講係香口膠嘅發源地，足球嘅水平唔高，雖然佢哋近年嘅排名愈推愈前，目前世界排名130，比起6年前「谷底」時嘅第201位可謂大躍進，但同美國比仍然差天共地。

今次係呢支球隊首次打入金盃決賽周，仲係靠當地足總向國內企業籌錢先至籌夠路費咋！喺美國做開少年足球教練嘅領隊伊恩莫克話就話成隊波都好有決心，但球員大部分嚟自國內聯賽，近6戰亦都只係贏過尼加拉瓜，今戰可以話係毫無勝算。

美國作為主辦國兼4屆冠軍，當然唔可以喺球迷面前失威，今次主帥奇連士文雖用咗當路雲、比士利等老將配搭碧舒亞等新秀，但小妹相信佢哋有心學巴西咁喺主辦嘅賽事拎番個冠軍，鬥心一定唔會差，當然要延續近5戰全勝、合共攻入15球嘅佳態，數多伯利茲幾粒啦！

美洲金盃：12支參賽隊伍分為3組，每組4隊，每隊都要互相對賽，勝出得3分，和得1分，負則0分，最後每組前兩名球隊，以及兩支最佳小組第3名將進身8強淘汰賽。

南美自由盃、巴西盃：今輪為自由盃4強，巴西盃第3圈，採為主客制兩回合淘汰賽，若兩回合總比數賽和，以作客入球較多一方獲勝，若作客入球數字相同，就要喺次回合90分鐘後互射12碼分勝負。