日職喺洲際國家盃後加開快車，浦和紅鑽今晚主場對FC東京，1.72倍入球大最抵玩。依家紅鑽追到落後榜首嘅大宮松鼠3分，主場肯定踩油爭取入球，加上射手興梠慎三好番，東京又有王牌渡邊千真復出，好容易開入球騷。

（有線61及201周三晚6:30直播）

紅鑽喺洲際盃期間，出戰日聯盃踢走大阪櫻花晉級，跟手又喺聯賽作客以1:0打沉甲府風林，撞啱大宮松鼠意外失分，家陣紅鑽距離榜首3分，主場唔搏等幾時？仲有呀，射手興梠慎三喺日聯盃因傷缺陣後，上場聯賽已經打番正選，意味紅鑽前線有更多選擇，應付快車賽程好着數，至少唔需要擔心球員腳軟嘛。

事實上，東瀛傳媒話日前紅鑽嘅操練已經減低訓練量，目的係避免球員喺酷熱天氣下，體能過度透支，既然高層咁識諗，紅鑽球員梗係要畀料交功課。再講，紅鑽本身兵源已經好足，中場柏木陽介已經話明，希望趁開快車爬頭上榜首，完成重奪冠軍嘅任務，好難相信紅鑽今場會滿足於和波，肯攻有利開入球大。

另一方面，東京日前喺主場以0:1不敵廣島三箭，王牌渡邊千真賽前突然傳出有傷缺陣，不過大家放心，消息話佢已經極速復原，預計今場會踢番，要知道東京為咗畀佢打正選，搞到連前鋒李忠成都激走埋，既然東京連盃賽近7場得1次保持清白，今場仲有後衞加賀健一停賽，渡邊千真梗係要嚟料幫手入波補番數啦！