世青盃決賽今晚開戰！法國U20同烏拉圭U20會喺今晚深夜合演一場終極戰。雖然烏拉圭一班小將表現令人驚喜，但小妹認為始終係火力最強嘅「小高盧雞」技高一籌，加上烏拉圭已經連續兩場踢足120分鐘，極有可能體力不繼，一於捧1.64倍主W，撐法國喺法定時間內贏波捧盃！

（無綫翡翠台、明珠台、高清翡翠台、TVB網絡電視01頻道、now801台及中央5台周日凌晨2:00直播）

烏拉圭喺今屆賽事可以殺到入決賽，其實全靠防線夠穩健，6場波只係失咗3粒，不過小妹擔心佢哋連續喺8強同4強戰都要踢足120分鐘，上仗更加要鬥到互射12碼先贏，對體力損耗都咪話唔勁，反觀法國打入淘汰賽就未試過要踢加時，體能上明顯有優勢啦！記得洲際盃嗰陣，西班牙喺4強踢足兩個鐘後，去到決賽嘅表現係點，相信大家都仲記憶猶新，小妹實在好擔心烏拉圭會步「狂牛兵團」後塵！

加上由法國喺4強對住加納嚟睇，佢哋嘅進攻足球確實比烏拉圭技高一籌，前鋒泰奧雲更連省兩粒，不讓隊中神射手耶耶辛洛高專美，難怪法國近3場夾埋可以入10粒、成為賽事入波最多嘅球隊啦！至於防線雖然偶有失誤，好彩嚟自巴黎聖日耳門嘅年輕門神艾路拿可以話係「托弗」，屢救險球，兵疲力弱嘅烏拉圭睇怕都要乖乖哋做「阿二」喇！

法國係今屆入波最多球隊，合共有15球，近10戰亦9度開入球大。

烏拉圭射手尼高拉斯盧比斯同法國前鋒耶耶辛洛高一樣，今屆交出4個入球及1次助攻。

法國係今屆唯一未踢過加時賽嘅球隊。

雖然法國火力驚人，但佢哋今仗有中堅烏迪迪停賽，後防更加不穩，就算烏拉圭體力透支都隨時可以「偷雞」入番粒，法國贏波嘅同時未必保得住清白，當然取1.93倍入球大啦！