換咗新帥領軍嘅紅魔今晚展開季前遠東之旅第一擊，喺曼谷出戰泰國明星隊。論卡士雖然曼聯贏晒，但講狀態就唔及對手，特別係紅魔去到泰國節目多多，想瞓覺好都難，加上朗尼突然受傷返國，讓到2球，梗係捧2.55倍「讓球主勝」好過啦！（now632台周六晚9:00直播）

費爵爺退休，曼聯要適應巨變改由莫耶斯領軍，力奇對呢位前拖肥教頭算有好感，不過佢由上星期正式開工到依家得短短幾日，要認清班球員特性都唔易，今仗第一戰相信試陣居多，想大勝似乎大貪咗啲！

再講，曼聯今次點兵19人到泰國，隊長尼曼查維迪因坐骨神經痛冇隨隊，搞到中堅位得番里奧及莊尼伊雲斯，一旦莫帥半場收起其中一個，無論搵隻閘或卡域克頂都唔穩陣。中前場嘅尹佩斯同香川真司要遲啲先歸隊，朗尼又傷埋，單靠韋碧克同新仔韋費特沙夏點去數人呀？

況且曼聯到咗泰國後出席唔少商業活動，又要去足球學校教小朋友踢波，卡域克到曼谷後第一日就怨過：「瞓得4粒鐘就要練波，我依家最緊要搵番自己對眼先。」班人個個都冇十足狀態咪寄望太高。

泰國明星隊由7間球會組成，雖然冇榜首雙雄武里南聯及春武里隊員在內，但諸如蒙通聯三寶，泰國國腳鄧達、北韓嘅李光川、南韓嘅金裕晉等都在陣。最緊要係泰超依家正值季中，球員狀態有保證，要守住唔好輸大鑊應該唔難！