美洲金盃A組最後一輪賽事，馬提尼克與墨西哥會師美國丹佛，從賠率所見墨西哥被捧為大熱，但佢哋喺賽事實際表現未如理想，今場並冇必勝把握，小弟決定鋤強扶弱，力撐馬提尼克2.9倍「+1」「讓主」。 （有線61台及201台周一早上6:00直播）

馬提尼克上場輸畀巴拿馬，後衞積奇貝迪斯兩黃一紅被逐，中堅基利天洛禁區撞跌對手被罰12碼都冇咩好拗，不過巴拿馬球員喺禁區內犯手球及侵犯前鋒古斯坦，球證都冇判以極刑，難怪領隊卡維蘭賽後怒寸球證發雞盲：「過去兩場，我數到5球12碼冇判！」雖然輸得唔抵，但馬提尼克今屆防守相當抵讚，往往以血肉長城瓦解對手攻勢，配合埋經驗老到嘅比基安尼喺前線搵食，今場唔係任人魚肉！

另一邊廂，墨西哥上場以2:0淨勝加拿大，若非前鋒馬哥法比安「影帝」上身，令球證判罰極具爭議性嘅12碼，間接協助佢哋攞到「燕梳球」，最終係咪袋晒3分好難講。再者墨西哥球員表現始終麻麻，前線把握力亦唔夠，喺今場和波都肯定出線嘅前提下，領隊荷西托尼隨時落柯打穩守，贏波鬥心成疑，熱爆「客勝」小心係糖衣陷阱。

現為分組賽階段，12隊分3組，每組4隊進行單循環比賽。每組首、次名，以及2支最佳小組第3名將躋身8強。小組同分將順序依據總球差、總入球數字、對賽成績排名。 

金盃A組