新一季德乙周六凌晨開鑼，其中揭幕戰仲有直播睇，由死過翻生嘅辛特侯遜主場迎戰阿倫。因為杜伊斯堡唔獲發牌得以戲劇性保留德乙資格嘅辛特侯遜，今夏痛定思痛，一口氣補入16名新兵，決心洗脫魚腩身份。反觀阿倫喺主力離隊，兼改由毫無經驗嘅魯頓貝克任教，即時變身降班膽，今場足智彩開平手盤，力奇捧1.93倍「主勝」！

（有線64及203周六凌晨0:30直播）

上季排德乙尾2嘅辛特侯遜，本來新季應該德丙再見，偏偏杜伊斯堡因為財政問題被貶落德丙，佢哋個位就由辛特侯遜補上。球隊管理層可能都唔想再失禮，今夏積極增兵，班費去到1,000萬歐元（約1億港元），要知道佢哋家陣仲未搵到波衫心口贊助，依家班人自然會格外落力踢，希望可以冧到有財團科水幫補吓收入。

講番人腳，佢哋上星期仲接收埋杜伊斯堡「孖寶」，塞爾維亞32歲前鋒祖雲奴域同22歲德國中場基洛爾，當中前者過往効力緬恩斯時有多達44場德甲經驗，應該可以為辛特侯遜提供唔錯火力。至於佢哋上季條勁失66球嘅豆腐防線，都得到唔少實力守將來投，包括斯洛伐克國腳沙巴夫尼克同潛質新星馬菲亞斯森馬文，預計可以大大減低失球數字。

阿倫對手上季排第9絕對係超額完成任務，不過今夏佢哋放走咗包括添基斯達、馬田杜治同科斯坦舒侯斯3名主力，教練仲要換上只曾帶領佢哋U23嘅魯頓貝克，呢位新帥都好老實話今季只以護級為目標，既然佢哋都打定輸數，仲點捧得落手吖？