主力輪流踢 未必交到貨

　　利物浦季前之旅第2擊，嚟到澳洲同墨爾本勝利拍跳，紅軍雖有射手蘇亞雷斯歸隊，不過主帥羅渣士話明畀大部分球員輪流踢，未必個個交到貨!反觀主隊獲澳洲國家隊放人，兩名防線主力歸隊，隨時守得住唔輸，撐5倍「讓主」!

　　亞視國際台周三晚6:00直播

　　紅軍上場作客小勝印尼明星隊2:0，今鋪有「哨牙蘇」歸隊理應更被睇好，不過呢個烏拉圭國腳近排扭緊計要轉會，未必有心為紅軍効力。羅帥尋日仲話班波左閘位置有漏洞，要買人填補，《每日郵報》爆料話佢哋有機會借華倫西亞個左閘阿里施蘇高，但遠水難救近火，更大鑊係紅軍今鋪預計由澳洲腳巴利鍾斯把關，雖則呢度係佢地頭，但平時坐多過踢落到場隨時手騰腳震!

　　墨爾本勝利主帥保斯迪高古，上周六帶領澳職明星隊輸畀曼聯1:5，吸收完上次教訓，今鋪再對英超球隊點都會有多啲計仔啩!賽前佢哋收到好消息，執走咗佢哋5名球員去踢東亞锦標賽嘅澳洲國家隊，領隊奧錫克突然大發慈悲放番守將干洛皮恩同門將尼敦高爾返歸，畀佢哋執番靚條防線鬥紅軍，肯決心死守嘅話未必輸梗!