朝美國喺主場迎戰洪都拉斯嘅美洲金盃4強，「花旗軍」核心當路雲持續Sharp醒表現外，候補入伍嘅艾迪莊遜亦即刻交到貨，再配合力爭金靴嘅雲度路斯基，火力唔係人咁品，一於捧2.07倍「讓球主勝」。

　　7月25日周四早上7:00直播

　　美國上場以5:1怒炒薩爾瓦多，全場控制戰局唔在講，領隊奇連士文踩油換入艾迪莊遜仲立即見效，落場唔夠1分鐘就頭槌建功，跟住仲整球靚助攻畀當路雲添。至於專心為隊友鋪橋搭路嘅當路雲，全場亦交出3球助攻，絕對係「花旗軍」嘅致勝關鍵。

　　雲度路斯基爭金靴

　　除咗當路雲、艾迪莊遜兩件弗爆，箭頭雲度路斯基目前以5球同巴拿馬中場加比爾托利斯並列射手榜，為求獨享金靴獎殊榮，落到場肯定自動波去盡，況且「花旗軍」喺4場金盃喪入16球，今場少少哋讓一球幾抵博o架。

　　另一方面，撇除最後一輪分組賽因為留力輸波，貫徹防守反擊戰術嘅洪都拉斯，喺其餘2場小組同8強一球不失雖然抵讚，但對手係海地、薩爾瓦多之流就話頂得住啫，今場換成「花旗軍」嘅狂轟濫炸，隨時未有反擊機會已經輸鑊甘!