上季聯賽攞第3嘅凱沙羅頓喺附加賽輸畀賀芬咸，搞到只能繼續留喺德乙打滾。今季佢哋買入前德乙神射手奧斯恩增強攻力，擺明想再次衝擊升班席位，佢哋今場對住有3位中後場主力唔踢得嘅恩高斯達特，有力大勝一場，2.28倍「讓主」要捧。

　　(開賽時間：周六凌晨2:30)

　　凱沙羅頓上季主場17戰入33球，主場火力冠絕德乙，當中首席射手艾迪素繼續留效，佢拍檔西蒙祖拿亦喺上場開齋，就算佢兩個失準，都仲有奧斯恩呢位前德乙神射手隨時候命，火力咁猛試問對手點頂?睇番佢哋上仗作客柏達邦全場狂攻對手，球員狀態弗到漏，今次返到主場氣勢更盛，要入多球唔係咩難事。

　　恩高斯達特新舊磨合需時

　　恩高斯達特今季由新帥馬高古爾斯執掌，隨即棄用部分舊將，並加入5位年輕球員改變踢法。不過新舊交替磨合始終需時，季初發揮肯定受影響。加上陣中兩大守將安德列米積杜域同麥迪梅斯達養傷，中場艾法度摩拉利斯上場領紅今仗停賽，陣容咁唔完整大敗一場唔出奇。