盧比斯捉草蜢報恩

　　歐聯第3圈外圍賽首回合今晚開戰，里昂主場對草蜢，熱捧1.88倍「讓球主勝」。今季里昂變動唔少，射手巴菲迪比高美斯幾乎肯定離隊，前鋒利辛度盧比斯隨時走人，臨別肯定喺球迷前踢番場好波，幫里昂大勝當告別禮。

　　(開賽時間：周三凌晨3:00)

　　里昂除咗有後衞洛夫雲轉投修咸頓，傳聞畀紐卡素睇中嘅射手巴菲迪比高美斯都幾乎九成走人，最近佢連熱身賽都冇份踢，今晚都唔使預佢。不過話晒里昂都係歐聯常客，好難相信佢哋墮落到連外圍賽都過唔到，主場出擊當然要贏多幾粒為次回合打底啦!

　　草蜢人腳削爆

　　仲有呀，里昂另一個食胡人物利辛度盧比斯， 講都可能轉會，就算唔去熱刺，都有大把其他球會排隊斟佢，不過佢由09年開始為里昂効力，話冇感情就呃你，既然將近離開，佢應該會幫手砌低草蜢，如果唔係，冇埋歐聯分組賽豐厚收入，里昂有排衰都似。

　　另一方面，草蜢請咗曾經執教利華古遜嘅新教練史基比領軍，不過佢對瑞士足球認識有限，可能連個別球員叫咩名都未搞得清楚，況且草蜢牌面相當削，得個借用嘅禾夫斯堡中場賓卡法利有啲卡士，首回合作客好易做炮灰。