適逢今年係英格蘭足球聯賽成立125周年，足總特別安排錫菲聯同諾士郡喺今晚合演新季英甲揭幕戰，由當今球壇最老牌球會，造訪全球最「大年紀」而又仲舉行緊職業比賽嘅布拉莫巷體育場。主隊錫菲聯喺新帥華亞帶領下虎虎生威，要砌低諾士郡冇難度，要1.75倍主勝。(開賽時間：周六凌晨2:45)

　　錫菲聯踢8場季前賽錄得5勝3和，造訪希甲隊伍艾杜美圖斯都唔使輸，一眾表現優異嘅球員好似門將佐治朗治、後衞哈利馬古尼同中場高亞迪已經盛傳入硬新一期英格蘭U21大軍，至於前鋒基斯樸達同利爾泰萊就喺季前賽合力省5粒，難怪新帥華亞話大把好球員使，淨係諗出邊個都諗到頭痛。相反諾士郡莫財冇錢增兵，最好波嗰件中場阿倫祖治又過咗布力般流浪，今仗想唔輸都難!