酋長盃士哥加Fun

　　一年一度嘅酋長盃今晚又嚟開戰，焦點大戰當然係阿仙奴主場迎戰換上賓尼迪斯領軍嘅拿玻里啦!雖然兵工廠季前賽經常大炒對手兼有主場之利，但拿玻里有英超經驗豐富嘅「肥賓」教路，又有王牌射手希古恩孭飛，要攻破廠仔防線唔係難事。既然呢項賽事規定「入波愈多、得分愈高」，兩支勁旅肯定會合演一場對攻戰，梗係捧1.65倍入球大啦!(now621及635台周六晚11:20直播)

　　賓尼迪斯熟晒阿仙奴

　　拿玻里喺上季意甲最終雖然落後祖雲達斯9分，屈居「阿二」，但單論入球數就以73球做「一哥」!就算今季換上經常被批踢法保守嘅賓尼迪斯揸旗，兼且主力射手卡雲尼離隊，點知呢支意甲勁旅喺3場熱身賽仍然喪入11球，就證明班波仍然相當「猛火」。

　　除咗原有嘅天才中場恩斯尼治同咸錫外，拿玻里今季更由皇馬買入希古恩同荷西卡利祖兩位射手，整體實力比上季更強。加埋「肥賓」喺英超「撈」咗接近7年，對阿仙奴已經非常熟悉，要領軍攻破對手防線，實在係Easy Job啦!

　　兵工廠熱身賽夠猛火

　　主隊兵工廠季前表現亦都非常可人，雖然對手只係東南亞同日本球隊，實力唔算太強，但4場入19球證明佢哋唔係好恰，基奧特4場入6球亦顯示呢位法國型男終於發揮前法甲神射手本色，同普多斯基及禾確特喺酋長球場拍住上，又使咩驚冇波入先?