雖然冇抖暑呢回事，但係鳥棲砂岩呢支日職中下游球隊响上個月動作多多，大手引入幾件踢得之人，今日佢哋作客面對柏雷素爾，有權同對手鬥攻，1.52倍入球大抵捧。(有線18台周六晚6:00直播)

　　柏雷素爾大腦李安度復出

　　鳥棲今季表現麻麻，試過有兩段時間踢得好差，分別係3至4月整咗段7戰不勝，5月更加聯賽加盃賽5連敗。因為咁，佢哋响7月猛咁換血，炒咗個巴西前鋒朗尼高美斯，然後簽番件森巴後衞尼爾遜列卡度返嚟，跟手再向櫻花、天鵝借用前日本國腳播戶龍二、菊地直哉半年，前中後三線都強化咗，加埋入選日本東亞盃代表隊嘅豐田陽平又fit到漏油，夠晒本錢同柏雷素爾對攻。

　　柏雷素爾因為要兼顧亞冠盃，响日職踢到唔上唔落，但係佢哋件中場大腦李安度杜明基斯已經傷愈復出，新進國腳工藤壯人、鈴木大輔經過東亞盃洗禮，信心愈嚟愈強，攻擊力拍得住紅鑽、三箭、水手呢啲勁嘢，同鳥棲夾手夾腳開個入球大唔難。