卡素尔头痛医脚防守曳

　　布力般流浪主帅份工好鬼难捞，上季贝治同艾伯顿分别教咗57同67日就畀会方兜咗，证明揸旗嗰几位印度班主唔容易服侍，现任领队加利保耶想保住份工嘅话，今晚喺联赛盃首圈造访卡素尔不容有失，布力般让平半一于要上盘。

　　(广东体育周四凌晨2:45直播)

　　主帅争胜保饭碗

　　加利保耶今个夏天动作多多，计埋前日签入喀麦隆后衞辛高，新季已经罗致咗11位球员，虽然话布力般喺英冠开锣战有鲁宾洛坚拿因伤退下火线，好彩后备入替嘅贝斯就省入救命波，帮球队逼和打比郡抢番1分，有呢位前纽卡素射手伙拍上季丧入29球嘅佐敦洛迪斯攻坚，布力般够晒本钱砌低卡素尔。

　　唔係话睇小越级挑战嘅卡素尔，不过佢哋嘅领队艾保特真係唔醒水，队波係上季英甲失波最多嗰队(44战失77球)，后防明明就唔掂，偏偏季前仲走去签圣美伦前锋李维士古尔同灿美尔翼锋艾莫，根本冇执执个后防，结果英甲首战咪输镬劲畀奥连特1:5囉，今晚对住火力同战斗力更强嘅布力般，想输少球都难!