庄家批死尹佩斯踢唔晒全场

　　英格兰社区盾今晚喺温布莱球场劲爆上演，曼联对韦根牌面上冇得斗，但红魔喺新领队莫耶斯执教下，明显挞唔着，而且有庄家开出尹佩斯攻入「最后入球」，就会安排部分投注回水，似乎係唔睇好佢踢足全场，既然係咁，进取啲博2.4倍入球细!

　　(now621及635台周日晚9:00直播)

　　曼联拿尼打柴

　　除咗王牌朗尼因为扭计转会冇得踢，英超冠军曼联仲有翼锋拿尼因伤要休息，至于热身赛打得最好，最多波入嘅新仔连格，英国传媒话佢唔会打正选，地位不稳嘅日本国脚香川真司会得到证明自己嘅机会，不过佢明显唔係托弗，而且因为曼联成日话要买法比加斯，搞到佢落场失晒魂咁，係咪帮到曼联开入球骚，真係好成疑问。

　　除此之外，爱尔兰庄家Paddy Power宣布，假如尹佩斯今场攻入「最后入球」，就会自动回水畀买咗「首名入球」、「最后入球」同「波胆」又唔中嘅波友，似係唔睇好喺热身赛期间受伤嘅佢可以踢足全场，既然尹佩斯被批死踢唔足全场，曼联今场当然更难开入球骚，就算曼联近3次出战社区盾，连开3次入球大、丧入8球都係咁话。

　　韦根新帅风格「硬淨」

　　至于上季拎到足总盃冠军，最后降班收场嘅韦根，以往由马天尼斯执教，的确好锺意唔识死同强队斗攻，但佢已经过档爱华顿，新领队奥云高尼係稳阵派，而且以往带领保顿，领军风格讲求硬淨，就算输都唔似会被任数。而且佢收购后衞白治、巴尼特、汤马士洛尼同门将卡臣，目的就係要加强后防实力，对住未入局嘅曼联未必会大败。

　　社区盾下半场多入波

　　对上4届社区盾，下半场出现13个入球，上半场得5个入波。

　　曼联近5次出战有4次捧盃。

　　韦根上季联赛对曼联，两循环都係输0:4。

　　计埋热身赛，韦根连续4场半场不失。

　　韦根下盘抵玩过「让客」

　　若果真係睇好曼联炒唔起韦根，除咗入球细，其实下盘都值得玩吓，事关红魔让到1.5/2，韦根下盘就算淨输两球都只係输半个盘，话晒泰国明星队同横滨水手都只係输1球，大坂樱花同AIK苏纳更加爆冷和到波，证明进入后费格逊时代嘅曼联，绝对唔及以前恐怖，下盘抵玩过「让球客胜」。

　　社区盾赛制

　　比赛以一场过决胜负，90分钟后打成平手，不会进行加时，直接射12码分高下。