各支英超劲旅喺转会窗最后阶段赶得切入货，令今季赛事增添色彩同冲击，形成英超冠军之争，竞争者并非只係曼市双雄及车路士。

　　先讲吓曼联，全能中场费兰尼加盟「红魔鬼」係佢同莫耶斯都双赢嘅局面，虽然费兰尼唔係大家心目中嘅贵价货，但呢名迟熟嘅「爆炸头」踢法多元化，更加係莫耶斯可以信赖嘅球员，对莫帅调兵遣将同建立自己势力好重要。

　　车路士正正欠缺一名正前锋，伊度奥喺呢方面绝对弥补咗球队嘅「空缺」，Peter相信以莫连奴嘅功力，伊度奥可以再显神通，回复番喺国际米兰时嘅水平。阿仙奴有「大眼仔」奥斯尔加盟，有呢名德国当打进攻中场压阵，比由二线中场路斯基及阿迪达发办可靠得多，而曼城早已入货，唔再多批评。

　　利物浦板櫈深令人期待

　　利物浦今季出闸表现特别好，再罗致马马度沙高及领队罗渣士早喺16岁时已经认识佢嘅域陀摩西斯，比起以往几季，后备力量的确增强咗好多。至于热刺高价卖走一早已经无心恋战嘅加里夫巴利，换来几名有实力嘅新兵，一个换四个，实力并冇削减，亦令人期待。

　　自9月2日转会窗关闭后，新兵今轮陆续亮相，边个球员适应时间快同磨练到良好默契，边个入啱货、入错货，经过几周赛事自有分晓。