「绝杀王」史杜列治唔弗

　　红军防守坚固、天鹅有后顾之忧，咁嘅Match Up试问又点会多波入?周二日凌晨英超独脚戏，唯一保持未失分嘅利物浦南下作客史云斯，红军虽有「绝杀王」史杜列治复任正选，但状态成疑，利记去到自由球场不嬲冇运行，近两造访不胜兼零入球，而主队心繫欧霸盃，3日后要作客华伦西亚，今战将留一手，捧细为妙!

　　(now 621周二凌晨3时直播)

　　稳字行头唔玩强攻

　　季初红军3战3胜曾做英超一哥，而咁啱3场都係靠史杜列治嘅入波绝杀对手赢1比0，已反映利物浦係靠坚固防守，而非强横攻力攞分，呢种「3分已袋，理鬼得你」嘅理念，相信已深植于主帅罗渣士脑中。事实上，罗帅曾教过史云斯，深知「天鹅」非善男信女;加上红军对上两次造访自由球场，一场输0比1，一场和0比0，以利物浦目前实力，今仗根本毫无甜头，故有理由相信，罗帅会继续以稳为先，绝对唔会恃住强势冒险进攻，就算今仗作客畀佢哋赢到，分分钟又係1球收工嗰隻。

　　由于有国际赛周隔一隔，令利物浦当红前锋史杜列治虽能赶及伤愈复出，但佢未必够弗再做救世主，加上「进攻右闸」格连庄臣有伤，今仗换上韦斯顿，助攻力更大打折扣。巴西天才菲腊比古天奴又势必被主队派专人紧身招呼，新借将域陀摩西斯又未必咁快融入球队，利物浦冇把握打破面对「天鹅」嘅入球荒。

　　史云斯留力打欧霸

　　史云斯对上一次打欧洲赛已经係91年嘅事，当时两回合输1比10畀摩纳哥，22年后再征欧洲，球会上下都极度重视，今季对上两次踢欧霸外围赛前明显留力，分别不敌曼联同热刺，整体演出麻麻。「天鹅」本周五凌晨就踢欧霸分组赛，作客西甲华伦西亚，大战当前，史云斯今场有所保留唔奇。

　　其实史云斯嘅小组入楔打法，因球队攻力非顶级，斗劲旅根本冇着数。唔计本季首战大败曼联脚下，上季「天鹅」主场斗曼城、热刺、阿仙奴、曼联、利物浦同车路士仅得4和2负，当中有5场都开细。球队今仗有快翼尼敦戴亚倦勤，中场舒维尔亦有伤在身未必可以倒戈，红军于英超仲未失波，今场双方入球唔慌多。

　　领队 Chit Chat

　　史云斯领队 米高卢特立：对史杜列治复出我感到惊讶，佢受伤唔踢国际赛，但48小时后又踢得联赛。係咪应该修例，球员受伤后3至4日唔可以踢球会赛事呢?

　　利物浦领队 罗渣士：史杜列治对错过国家队嘅赛事感到失望，佢好想为英格兰上阵o架!今场因为係周一波佢先有得踢，如果係上周六打就唔使预佢。