歐國盃：烏克蘭撼法國軍刀再嚟料
2012/06/15文:李克勤 
 

主場威力的確厲害，「核彈頭」舒夫真高兩記頭槌反勝瑞典，協助烏克蘭升上D組榜首，軍刀於賽後訪問亦說對出線充滿信心，每場都當作決賽般應戰！今場面對同組實力最強的法國，法國上場對英格蘭共作出19次射門，攻力極強。總括來說，D組實力平均且冇弱旅，而被低估的一方往往會有更佳表現。

英法大戰看得我緊張萬分，最後和波收場好合理，不過除門將赫特及尼史葛有出色表現外，我覺得柏加應記一功，他在中場掃蕩工作極為稱職，每每都「瞓身」搏盡，死球戰術及突擊戰術成為英軍新殺着。今場如擊敗瑞典的話，最後一輪對烏克蘭有朗尼復出，出線機會自會大大提升。

今次我在歐國盃主要擔任評述工作，並主持前奏節目搞氣氛和玩遊戲，暫時觀眾和贊助商的反應都十分正面，連續的捱更抵夜亦覺值得。

英格蘭擁躉李克勤，今屆化身成nowTV歐國盃大使陪你睇足31場大戰！